Trátase da xornada final do Proxecto O COUREL DESTINO E FUTURO na área de turismo para debater e achegar solucións desde a colaboración público-privada. Búscase apoiar novas iniciativas emprendedoras de turismo, e para iso os distintos sectores gastronomía, natureza, patrimonio e os medios de comunicación abordarán a promoción do Territorio do Courel para o seu desenvolvemento de forma sostible.
Presentarase -para escoitar opinións- unha marca para os produtos alimentarios do Courel e para a promoción turística no seu conxunto, capaz de atraer mais visitantes e clientes ás empresas dos 3 Concellos: Folgoso do Courel, Quiroga e Ribas de Sil.
Convídase a participar da actividades a todas as empresas vinculadas co turismo, aloxamentos rurais, casas de turismo rural, albergues, gastronomía, a produción de viños, mel, aceite, ou os roteiros de natureza e patrimonio.
Da presentación e dirección da xornada encargarase o xornalista, Xulio Xiz. A alcaldesa de Folgoso do Courel, Lola Castro e José María López Bourio como representante da organización encargaranse da benvida. Da primeira mesa redonda participarán representantes de distintas administracións co tema: As administracións públicas e o seu compromiso co futuro turístico do Courel.
Ás 10:45, representantes de axencias de viaxes debatirán sobre As axencias de turismo como promotoras do turismo de experiencias no Courel. Ás 12:00 representantes de distintos medios de comunicación abordarán a promoción turística do Courel. Na última mesa redonda participarán os actores locais que atraen turistas ao Courel e posteriormente o presidente do Clúster e Turismo de Galicia clausurará as xornadas. Rematarase con degustación de produtos.
