O Xeoparque Montañas do Courel conta cun novo punto de observación situado na serra de Vilañán, no Concello de Quiroga. A estrutura permite contemplar a totalidade do val do río Quiroga dende o seu nacemento na cara suroeste do Pía Páxaro, preto de Vilarbacú, coa unión dos regos Porto Murelos, as Lagoas e Curuxido, ata a súa desembocadura no río Sil en Quiroga, tras recorrer 24 km.
Para facilitar o acceso colocouse unha escaleira de madeira e unha varanda, que se complementaron cun banco que permite gozar das vistas e da paz e tranquilidade que se respira neste lugar. Como remate da obra, nuns días, colocarase un panel explicativo da zona que se pode ver dende este punto.
Numerosos núcleos espallados por todo o val, Quiroga, San Clodio e puntos destacados como o Pía Páxaro (1.610 m) e Formigueiros (1.639 m), os cumes máis altos do Xeoparque da UNESCO; o Alto do Boi, límite entre os concellos de Quiroga e Folgoso do Courel, ou Castro de Ares poden contemplarse dende este miradoiro. Sen esquecernos da serra de Ribas de Sil na subida a San Xoán de Río (Ourense).
O miradoiro está situado a 7 km de Quiroga. Os primeiros 4 km de pista asfaltada son o acceso dende a vila quiroguesa a Vilañán, os tres seguintes discorren por unha pista de terra, a mesma que leva ata o despegue de parapente.
Este percorrido foi o que fixo o alcalde de Quiroga, José Luis Rivera, para comprobar esta nova estrutura e as súas vistas. O miradoiro xa forma parte da rede de miradoiros do Xeoparque Mundial Nontañas do Courel, que a través de 26 puntos estratéxicos repartidos por todo o seu territorio permite observar a rica historia xeolóxica, a paisaxe e o patrimonio cultural que este xeoparque engloba.
Miradoiro de Vilañán / Concello de Quiroga
