A CIG-Saúde da Mariña e a CSIF de Monforte denunciaron a “sobrecarga de traballo e a situación de desborde” á que se enfrontan os profesionais da atención primaria da área Sanitaria de Lugo-A Mariña-Monforte, que ven obrigados a modificar as súas axendas ou a derivar as urxencias.

A CIG declarou que “á situación insustentable na atención primaria de Viveiro e O Vicedo, agora súmanse tamén O Valadouro e Alfoz”, as cales estarán durante unha semana sen atención completa e derivarán as urxencias ao Centro de Saúde de Foz.

En canto a Monforte, CSIF denuncia, a través dun escrito, a “preocupante realidade que viven diariamente estes traballadores debido á falta de previsión por parte do Sergas, que os obriga a enfrontarse a un volume de traballo inasumible, con continuos cambios nas axendas e falta de coordinación nas mesmas”.

Desta forma, explicaron que cando o número de facultativos presentes diminúe a 4, os profesionais sanitarios ven obrigados a pechar axendas a partir das 12,00 e a reprogramar máis de 500 citas. No caso de ser só 3 facultativos, limitaranse a atender as urxencias.

RECLAMACIÓNS DOS SINDICATOS

A CIG-Saúde A Mariña esixiu a cobertura de todas as ausencias para garantir unha “calidade asistencial digna”, polo que consideran fundamental “rescatar a sanidade pública galega e dignificar a Atención Primaria fronte aos gobernos do PP que pretenden convertela nun privilexio”.

Pola súa banda, CSIF de Monforte reclamou “mellorar a coordinación entre a Dirección Provincial e os Centros para que o persoal de Admisión teña acceso anticipado ás axendas, permitindo unha planificación adecuada” e “garantir a dotación suficiente de facultativos para cubrir baixas e permisos, informando coa debida anticipación”.