A maxistrada do Xulgado do Penal número 1 de Lugo inhabilitou durante tres anos para a tenencia de animais, así como para o exercicio de profesión ou comercio que teña relación con animais, a un veciño de Samos por envelenar a unha gata con raticida. A xuíza, que o considerou responsable dun delito de malos tratos animais, tamén o condenou a un ano de cárcere, pena cuxa execución suspendeu durante un prazo de dous anos, condicionada a que durante ese período non delinca.

A sentenza considera probado que o acusado, en agosto de 2021, colocou no limiar da entrada dunha casa deshabitada que se atopa a un vinte metros do seu domicilio dúas porcións dunha mestura de penso para animais e un veleno empregado para roedores. A maxistrada indica que unha gata propiedade dun veciño da mesma localidade, quen asegurou que o condenado “sempre se queixaba polos gatos”, sufriu unha intoxicación tras inxerir de forma parcial un dos cebos colocados polo procesado. Para a curación das lesións necesitou tres días de ingreso hospitalario. Ademais, a xuíza resalta no fallo que a localidade de Samos ten a consideración de zona protexida, ao estar incluída dentro da ZEC Os Ancares-Courel.