Na inauguración da exposición o pasado 22 de marzo estiveron, ademais do público asistente, a protagonista, Mercedes Mondelo; o Alcalde de Quiroga, José Luís Rivera; e o concelleiro Luis Manuel Arias.
O rexedor quirogués deu a benvida e presentou á pintora orixinaria de Montefurado e a continuación o profesor Pepe Pol dedicoulle unhas verbas que escribiu para autora. Mercedes Mondelo, emocionada, tivo palabras de agradecemento para os presentes e, sobre todo, para a súa familia.
A artista, Mercedes Mondelo, desenvolveu a súa vida profesional entre Galicia e Canarias como profesora de Matemáticas vivindo na actualidade en Santa Cruz de Tenerife. A temática da súa obra vai dende o realismo ata o abstracto. No realismo –no destacan a potencia das casas vellas de Montefurado– a artista afirma, que cada parede, porta ou ventá é unha homenaxe aos seus antepasados, mentres que no abstracto deixa voar a imaxinación permitindo que as cores se apropien do lenzo.
Mercedes Mondelo forma parte dende hai case vinte anos dun grupo de pintura en Tenerife (Club de Mar Radazul) e conta que a súa afección por esta disciplina artística chegoulle de nena, observando ao seu veciño, o pintor Sr. Andrés.
