O corte do tráfico do paso a nivel situado na rúa Reboredo, no punto quilométrico 2+445 da vía férrea, faise por obras de mellora que o ADIF está a levar a cabo na vía férrea Monforte de Lemos-Ourense. Estes traballos enmárcanse no proxecto de renovación de vía na liña 810 Monforte de Lemos-Ourense, tras finalizar hai uns días as obras que obrigaron a pechar o paso a nivel da rúa Escultor Francisco Moure
O itinerario alternativo marcarase a través de sinaléctica oficial a cargo da Policía Local e será o seguinte:
Para o corte deste paso, o tráfico de entrada a Monforte desviarase pola N-120 de forma que se sinalizará no punto de enlace desta con dita rúa para dirixilo cara a seguinte saída por Rúa Benito Vicetto, colocándose sinais informativas a ambos lados.
Para o tráfico de saída de vehículos que procedan de Monforte centro e que pretendan acceder dirección N-120 ou Polígono Industrial do Reboredo, establecerase como ruta alternativa a vía asfaltada que enlaza as estradas LU-P-3201 (Monforte-Sober) a altura de Piñeira coa LU-P-3205 á altura do enlace para a parroquia de Guntín.
Sinalizarase tamén en rúa Compañía para que os usuarios que así o desexen accedan por rúa Francisco Moure e Benito Vicetto a N-120, e desde esta ó Polígono industrial do Reboredo e restantes vías da zona.
