En Monforte de Lemos, a compañía substituíu, no lugar de Reigada, o centro de transformación existente por un novo e reforzou a rede de baixa tensión instalando máis de 2.200 metros de cable. Así mesmo, a compañía tamén substituíu o transformador existente no Morín por un novo en caseta, e construíu unha nova liña de baixa tensión para reforzar a rede de distribución.

Na Pobra do Brollón, UFD reformou a liña de media tensión aérea no lugar de Santa María de Piño e instalou un novo centro de transformación con caseta e a súa liña de baixa tensión soterrada asociada para mellorar a calidade da subministración na zona.

A compañía inclúe cada ano no seu plan de investimentos actuacións e iniciativas para potenciar as infraestruturas de subministración de enerxía eléctrica e mellorar a rede de distribución eléctrica, especialmente en zonas rurais, contribuíndo así ao desenvolvemento económico destes territorios e á mellora das súas condicións de vida.

Para o novo delegado de UFD na provincia de Lugo, Jorge Mato, “o investimento realizado en Monforte e A Pobra do Brollón é unha proba máis do compromiso desta compañía co desenvolvemento enerxético da comarca de Lemos, xa que as actuacións realizadas aumentarán a capacidade da rede de distribución do municipio, ademais de mellorar a fiabilidade da subministración eléctrica e minimizar os tempos de resposta ante calquera incidencia no municipio.”

UFD, distribuidora eléctrica de Naturgy, xestiona na provincia de Lugo máis de 7.400 quilómetros de rede de baixa e media tensión, preto de 2.500 centros de transformación e dá servizo a máis de 87.000 puntos de subministración.

En Galicia, dá servizo a case 1,6 millóns de puntos de subministración en 286 municipios das catro provincias galegas, a través dunha rede de 60.300 quilómetros de liñas de alta, media e baixa tensión. A distribuidora eléctrica investiu 222 millóns en 2023 na dixitalización e mellora das súas máis de 60.000 quilómetros de rede en Galicia, o que supón un incremento do 60% con respecto ao ano anterior. Só no últimos cinco anos, o investimento de UFD superou os 723 millóns de euros para reforzar as súas infraestruturas en Galicia, co foco posto na mellora da calidade de servizo aos seus clientes.