O Concello de Chantada centra a actividade do Obradoiro no Parque Eloísa Rivadulla. Así o alumnado de Albanelaría estivo acondicionando o parque e mellorando a súa accesibilidade. Habilitáronse ademais novos baños públicos, mellorando os pendellos que se crearan cun Obradoiro anterior, fixéronse uns baños accesibles para uso da xente que visita o parque.

Esta semana comezaba a traballar no Parque Eloísa Rivadulla o módulo de Xardinaría. Ademais de pequenas obras e mantemento de xardíns, neste parque eliminarase a zona de aparcamento para dotalo dunha zona verde axardinada con árbores e bancos.

“Queremos humanizar o Parque Eloísa Rivadulla con estas melloras. É un privilexio ter en Chantada este espazo tan amplo e tranquilo. Temos as pistas de tenis, a escola infantil, está ao carón o centro de día, o restaurante que é unha concesión municipal. E agora estámoslle dando máis accesibilidade e comodidade como zona verde para o esparexemento”, asegura o alcalde de Chantada, Manuel Lorenzo Varela.

Coa transformación do aparcamento do Parque Eloísa Rivadulla en zona axardinada, o Concello de Chantada habilita un novo espazo para estacionamento. Trátase dunha finca na rúa Muiñeira de Chantada, que un particular cede ao concello para acondicionar como parking público.

Obradoiro de Emprego Serra do Faro VIII / Concello de Chantada