Preto dun cento de estudantes do IES As Lagoas de Ourense coñeceron o pasado luns, 15 de abril, os escenarios da novela A boca do monte acompañados de Celia Díaz Núñez, a autora da obra literaria publicada pola editorial Galaxia no ano 2016. A obra  recrea a construción do túnel de Montefurado no século II, en tempos do emperador Traxano, para recoller o ouro que o Sil arrastraba ao seu paso.

O roteiro iniciouse en Rairos, ao pé do Castro de Ares, punto onde comeza e remata a novela, e continuou ata o túnel de Montefurado, coñecido popularmente como a Boca do Monte, onde puideron contemplar o inmenso oco aberto na montaña e que representa un dos grandes logros da enxeñería romana. O percorrido continuou por Augasmestas e as Covas do Medo de Margaride, lugares que teñen tamén presenza na ficción literaria da escritora e profesora quiroguesa.

En cada punto do itinerario os estudantes coñeceron os aspectos históricos que sustentan a trama e leron fragmentos significativos da novela localizados neses mesmos lugares. En palabras de Celia, “literatura e historia déronse a man e achegaron aos estudantes un patrimonio xeográfico e histórico de extraordinaria importancia”.