A actividade enmárcase no proxecto Comunidades Rurais Sostibles desenvolvido por Acción contra a Fame e cofinanciado polo Fondo Social Europeo Plus e a Fundación MAPFRE. Nesta primeira xuntanza analizarase a situación do desenvolvemento das Comunidades de Montes da zona e todo o seu potencial. Presentaranse opcións para mellorar os recursos forestais, agrogandeiros, económicos e sostibles, así como as diversas alternativas para o seu desenvolvemento e posta en marcha.

Asistirán especialistas e casos de éxito como José Manuel Iglesias, da Comunidade de Montes O Carballo (Friol) e representante da empresa Tenzas; José E. Valcárcel, representate da Comunidade de Montes de Ousende; Felipe Castro, axente forestal; Daniel Canosa da Fundación Juana de Vega; Guillermo Díaz de Coureleando e Francisco J. Domínguez, resineiro e formador.

O obxectivo é chegar ao maior número de persoas que aposten polas Comunidades de Montes como vía decisiva na fixación de poboación e emprego/emprendemento para a dinamización e activación do sector en todo o territorio. Se a acollida desta xuntanza é exitosa, será a primeira de moitas onde se realizará un acompañamento efectivo aos plans de acción e intereses comúns que se detecten e requiran de dinamización.

Dende Acción contra a Fame animan a participar nesta xuntanza para apostar en común polo desenvolvemento sostible e aproveitamento dos recursos do territorio. Aquí o enlace de inscrición.