A Asociación de empresarios e comerciantes do Xeoparque Montañas do Courel, que reúne empresarios e comerciantes do territorio que abrangue os concellos de Folgoso do Courel, Quiroga e Ribas de Sil, celebra este sábado 25 de maio unha festa na localidade de San Clodio. Será o segundo encontro deste tipo que organizan co fin de dinamizar o territorio e vivir unha xornada de confraternidade veciñal.
PROGRAMA
As actividades comezarán pola tarde, tendo lugar ás 16:00 horas unha charla sobre o Xeoparque e a actividade empresarial no salón de actos do Concello de Ribas de Sil.
A continuación, ás 17:00 horas, desenvolverase un torneo de Chave previa inscrición dende as 16:00 h. Terá lugar na Praza do Concello e haberá trofeos para os/as tres primeiros/as clasificados/as.
Para a cativada están programados xogos populares a partir das 17:00 h. e ás 19:00 horas unha interesante actividade que consistirá nunha ‘cata de aromas’.
A partir xa das 20:00 horas está programada unha cata de viños a cargo de Pablo González da Adega EDV. No evento colaboran tamén as adegas Val de Quiroga, Lar de Ricobao e Casa de Outeiro.
E xa como fin de festa, a partir das 21:00 horas haberá pancetada e biscoito de balde para os asistentes con actuacións musicais a cargo do cantante quirogués Julio Ferrín e o coñecido DJ Míchel.
