O pasado sábado, durante o acto institucional de entrega de recoñecementos á acción voluntaria de Cruz Vermella, o monfortino Manuel Valcárcel Cabo recibiu o Diploma de Honra de Cruz Vermella.
Manuel é voluntario de Cruz Vermella en Monforte de Lemos, membro do comité local, e colaborador activo do departamento de comunicación axudando a difundir as actividades desta organización non gubernamental. O seu compromiso e dedicación, especialmente durante os incendios de Courel en 2022, tivéronse en conta para este recoñecemento ao visibilizar o esforzo e o labor de Cruz Vermella nesas datas tan críticas.
Ademais do seu incansable labor voluntario, Manuel é un talentoso fotógrafo cuxa paixón e habilidade capturan a esencia das accións e o espírito da Cruz Vermella.
“Desde Cruz Vermella queremos agradecerlle profundamente a súa entrega e contribución continua”, comenta finalmente Manuel María López, responsable provincial de comunicación.
