A Deputación de Lugo vén de iniciar en Paradela os traballos da estrada provincial LU-P-4202, que é a que conecta Pacios e Currelos, no Saviñao, por Aldosende. Unhas obras nas que a institución provincial inviste preto de 80.000€ e que afectan ao tramo que vai desde o punto quilométrico 3,250 e o 5,000.
Os traballos consistirán na mellora da drenaxe mediante a reapertura das cunetas, a súa limpeza e pavimentación nos puntos nos que sexa preciso; renovación do firme con aglomerado en quente, e renovación da sinalización mediante o pintado da vía con marcas reflexivas brancas e reposición da sinalización vertical. O prazo de execución destes traballos é de dous meses, pero a adxudicataria –FEVISA Vías y Obras SL- comprometeuse a telos rematadas en mes e medio desde o seu inicio.
Nos últimos anos, a Deputación xa investiu medio millón de euros para a mellora e renovación do pavimento de 12 quilómetros de estradas que unen Paradela e Currelos, no Saviñao.
