A Asociación Boca do Monte, encargada de organizar as festas da aldea dos Anguieiros, propón para o 20 de xullo pola mañá –de 9 a 13:00 h.– unha camiñada que percorrerá un tramo do Camiño de Inverno e as aldeas da parroquia de Montefurado: O Ermidón, O Ivedo e Alvaredos. Neste último punto abrirase a adega Alvaredos Hobbs. Saída e chegada na Praza de Montefurado, onde a Igrexa. A información ao detalle da andaina está publicada na súa páxina web.
Tamén ás 9:00 h., e como novidade este ano, haberá unha sesión de Mindfulness. Os interesados e as interesadas teñen que contactar para reserva e info ao detalle no whatsapp 637290204
Xa pola tarde, de 19 a 21:00 h. terán lugar os xogos populares interxeracionais. Preferentemente para a cativada pero para poder participar os maiores acompañándoos. Os xogos previstos: Chave (2 diferentes), Bolos Celtas, Petanca, Billarda, Carreira de sacos, tiro de corda por equipos e xogos de auga.
Para as 21:00 h. queda xa unha merenda popular para os asistentes e Foliada ata as 23-24 h. A foliada será amenizada polo Grupo Tradicional “A cadela asasina”.
DOMINGO 21
Este día o prato forte será o XII Campionato de Bolos Celtas. Trátase dunha actividade á que a asociación dedícalle un tratamento especial pois dende hai anos están a recuperar na aldea este xogo tradicional tras moitísimos anos sen xogarse. Cada ano apúntase máis xente que vén incluso de puntos remotos de Quiroga.
Xogan homes e mulleres e despois daranse premios aos 5 mellores homes e ás 5 melloras mulleres clasificadas.
Será de 10 a 12:30 h. e este ano contan con varias sorpresas. A presenza dun divulgador de xogos populares a nivel nacional, Fernando Maestro, e a participación como convidados do humorista Xan Veiga e da actriz galega Lidia Veiga.
A continuación, de 12:30 a 13:00 h. Alborada a cargo de Abertal, grupo tradicional da Rúa; e ás 13:15 h. procesión e misa na capela dos Anguieiros.
Ás 14:00 h. música de novo con Abertal, con aperitivo popular aos presentes e sorteo das Rifas da Madalena con premios moi interesantes de produtores e artesáns de Quiroga.
