Isabel Vilalba explicaba que a situación no sector do viño non é algo puntual que non se vira vir, a caída no consumo de viños tintos en toda Europa vense constatando nos últimos anos, “e ademais no caso da Ribeira Sacra xa hai uns stocks que se veñen arrastrando dende a pandemia da COVID”.

“É un momento moi complicado, que pode ser dramático para unha comarca na que o mantemento da viticultura ten un impacto directo no tecido económico e social”, por iso aseguran que convocan a mobilización do día 6 con UUAA, “parécenos fundamental dar unha resposta inmediata”.

A este respecto aseguran que desde abril mantiveron comunicacións coa Conselleira do Medio Rural e co Consello Regulador da D.O. Ribeira Sacra, ata que coñeceron “a chegada de cartas ás persoas viticultoras confirmándolles a non recollida da uva”.

“Case estamos á porta da vendima e segue sen haber medidas anunciadas, non entendemos por que a Consellaría non pon medidas enriba da mesa. Tanto o ano pasado como este anunciou destilación de crise pero non habilitou orzamento, tampouco explicou por que non se optou por unha poda en verde. O 12 de agosto a Conselleira anunciounos que se ían tomar accións na semana seguinte, sen que finalmente se producira tampouco ningún movemento”, explica a Secretaria Xeral do SLG-CCLL.

Lembran que a posibilidade dunha non recollida na Ribeira Sacra é un problema moi grave que afecta a centos de produtores e produtoras e que pon en risco tanto o actual tecido produtivo como o relevo xeracional. Amosan tamén as¡ súa preocupación por como pode afectar a situación actual á vindeira campaña.

“Demandamos á Xunta de Galicia que sexa habilitado un orzamento de crise para apoiar ás persoas viticultoras e ás adegas, optando paralelamente por aquelas medidas que liberen ou reduzan os stocks, pero sempre co compromiso de recollida da uva e mantemento dos prezos”, concreta Isabel Vilalba. “Precisamos un plan integral adaptado ás estratexias de consumo e a este momento de crise, pero tamén con visión de futuro. A Consellería debería convocar unha mesa de traballo para poder deseñar unha estratexia que aborde o sector no seu conxunto”.

A proposta de actuacións dos sindicatos convocantes é a seguinte:

• Grarantía de recollida de uva e prezo
• Orzamento de crise
• Limitar plantacións
• Campaña de promoción importante diferenciando á DO Ribeira Sacra
• Mapa claro que permita coñecer con certeza os límites da DO
• Estudio de custes da produción de uva na Ribeira Sacra
• Estratexias de adaptación a novos hábitos de consumo