A pasada semana tivo lugar en Santiago o acto de entrega dos premios aos gañadores da décima terceira edición de Lingua de namorar, o certame en liña impulsado pola Xunta de Galicia que promove a creación de mensaxes de amor en galego entre a mocidade.
Lara Meneses, directora xeral de Xuventude, destacou que esta nova edición de Lingua de namorar pon de manifesto, unha vez máis, “o talento e creatividade da mocidade de Galicia”.
No acto de entrega, no que tamén estivo presente o secretario xeral da Lingua, Valentín García, tivo lugar como de costume do Pazo de San Roque, tamén estiveron presentes membros do xurado do certame. Ademais, os gañadores e as gañadoras, que puideron recitar os seus poemas aos asistentes, estiveron arroupados polos seus familiares e amigos.
PREMIOS E CATEGORÍAS
Na categoría de idades entre os 14 e 19 anos, recolleu o primeiro galardón a coruñesa Abril Viqueira Pose pola mensaxe Reflexos. O segundo premio foi parar á baionesa Luna García Guimeráns por Amor nos teus, mentres que o terceiro recaeu no vigués Alejandro Alonso Lago co texto Razón e emoción.
Doutra banda, na categoría de 20 a 35 anos, foron distinguidas a lalinense Elvira Nercellas Rodríguez, primeiro premio pola mensaxe Auga do corazón; Andrea López Otero, de Pantón (Lugo), segundo premio pola composición B612 só ida, e Clara Pérez Martínez, da Bola, terceiro premio polo poema A tonalidade dos vínculos.
Os dous primeiros premiados de cada unha destas categorías recibiron un patinete eléctrico, mentres que os segundos un altofalante bluetooh, e os terceiros uns auriculares sen fío.
ANDREA LÓPEZ OTERO
Esta rapaza, natural de Pantón, gañadora do concurso na edición deste 2024 conseguiu xa neste mesmo certame ‘Lingua de Namorar’ o terceiro premio de forma consecutiva os anos 2021, 2022 e 2023.
Ademais, vén de publicar a novela “Crónicas de Vanusum I. El Reino de los Reinos” e participa activamente nos Slam Poetry de Bóveda, encontros nos que ten resultado tamén premiada.
OBRA PREMIADA: “B612 só ida”
Esta vez,
coma unha molécula de gas eclosionando efímera
no medio do marabilloso e extraordinario caos
asimétricos e imperfectos
voamos en segredo
ata Plutón
para ser eternos
nesa nova forma natural e metafísica
que un día
cando aínda non existían os días
se nos concedeu,
entre o morrer e o renacer do máis alá,
amarnos para sempre.
