Os traballos de conservación na ponte que une as localidades de Quiroga e San Clodio, por enriba do río Sil, están promovidos e financiados pola Deputación de Lugo e contan cun investimento duns 40.000 €.

O prazo de execución previsto é de dous meses, inclúen o fresado e reposición dunha zona con afundimentos, pavimentación da estrada completa, reparación e pintado da varanda metálica, substitución dunha luminaria, reparación estrutural das beirarrúas e sinalización co pintado das marcas viais.

UNHA PONTE MOI IMPORTANTE PARA OS DOUS CONCELLOS

A ponte é empregada a diario pola veciñanza de San Clodio –capitalidade do concello de Ribas de Sil– e a vila de Quiroga, dando un servizo fundamental a un territorio no que se concentran preto de 4.000 persoas. A proximidade entre estes núcleos de poboación, apenas 1,5 quilómetros, fai que ambas localidades compartan recursos e servizos. Ademais, esta ponte dá servizo directo ao Centro de Interpretación da Minería Aurífera Romana (CIMAR), un recurso turístico de importancia na contorna.