O Deputado de Turismo, Eduardo Vidal Baamonde, participou na reunión do Foro Termal do Eixo Atlántico, que tivo lugar este martes 11 de decembro, co fin de perfilar os últimos detalles para a publicación desta guía do termalismo na Eurorrexión. O obxectivo desta publicación é impulsar a promoción termal das 34 cidades que conforman o Eixo Atlántico.

Vidal Baamonde subliñou que “dado o alto potencial turístico da auga, é importante que a provincia de Lugo figure nesta promoción conxunta de destinos termais. Lugo ocupa un lugar privilexiado polo seu patrimonio termal e tamén pola súa longa traxectoria histórica dos usos termais da auga, que se remontan á romanización”.

Nunha aposta por potenciar os recursos termais tamén se desenvolve o programa Lugo Termal, un programa de promoción do turismo mineromedicinal lucense, para o que a Deputación duplica as prazas este ano, chegando ás 1.200. Queda constancia do interese da xente neste programa porque desde que de puxo en marcha, hai 8 anos, levan participado nel, con tratamentos mineiromedicinais en establecementos da provincia, máis de 5.000 persoas.