Con motivo do Día Internacional das Persoas con Discapacidade, COGAMI e o seu movemento asociativo formado por 60 entidades representativas da discapacidade física e orgánica en Galicia lembran que, malia os avances conqueridos, seguen a enfrontarse a multitude de barreiras que dificultan a súa inclusión na sociedade.
Láianse de que “dende a educación ata o emprego, pasando polo acceso á saúde, o lecer e a cultura, a discriminación por razóns de discapacidade continúa sendo unha realidade”, unha situación que din resulta aínda máis grave para as mulleres e nenas con discapacidade.
En palabras do presidente de COGAMI, Anxo Queiruga, “a sociedade debe tomar conciencia de que moitas persoas con discapacidade e as súas familias viven a súa vida marcada polo incumprimento dos seus dereitos. O dereito a vivir de maneira autónoma e independente precisa dunha sociedade libre de barreiras físicas, mentais, sociais e psicolóxicas”. Queiruga explica que nos últimos anos producíronse avances para o colectivo pero apunta que “aínda que se perciben melloras nalgúns aspectos, queda moito por facer para garantir a igualdade de oportunidades e a non discriminación en todos os ámbitos da vida”.
REIVINDICACIÓNS E DEMANDAS
Dende COGAMI adherínse ás reivindicacións do Manifesto lanzado polo CERMI (Comité Español de Representantes de Persoas con Discapacidade) para este 3 de decembro, nas reivindicacións respecto á vivenda como soporte vital da autonomía e independencia das persoas con discapacidade. “Reclamamos o dereito a vivir nun domicilio libremente elixido, cos apoios que se precisen, pertencendo e participando na comunidade. E para que este dereito sexa efectivo, a vivenda debe ser accesible, alcanzable e inclusiva”, din.
Tamén reclaman que haxa avances no que se refire á autonomía persoal. Avogan por un sistema de atención que promova a vida independente das persoas con discapacidade, evitando na medida do posible, a institucionalización.
No que respecta á saúde, educación e emprego tamén revindican accións de mellora. Entenden que resulta moi importante actualizar a lexislación sobre o dereito á saúde das persoas con discapacidade, garantido a detección precoz, a atención integral e accesible en todo o territorio, especialmente nas áreas rurais. E piden tamén desenvolver un Plan de Atención Sociosanitaria, que promova a cooperación entre os servizos sociais e sanitarios; continuar coa renovación e actualización do Catálogo Ortoprotésico do Sistema Nacional de Saúde, para que responda ás necesidades das persoas con discapacidade e maiores; garantir o financiamento público de produtos sanitarios, o acceso a tecnoloxías e intervencións sanitarias; e o acceso universal a servizos accesibles de saúde sexual e reprodutiva, incluídos os de planificación familiar.
No eido da educación reivindican desenvolver plans integrais de atención temperá e impulsar plans de educación inclusiva, garantido que todo o alumnado teña acceso a itinerarios educativos en igualdade de oportunidades. Impulsar programas de accesibilidade nos centros educativos, adaptando espazos e recursos ás necesidades do alumnado con discapacidade. E no emprego impulsar a nova Lei de Inclusión Laboral, establecendo políticas activas de emprego adaptadas ás necesidades das persoas con discapacidade. Modificar a lexislación do emprego público, incrementando a cota de reserva do 7% ao 10% nas administracións públicas. Fomentar os Centros Especiais de Emprego de Iniciativa Social e garantir recursos adecuados para que as persoas con discapacidade poidan acceder ao mercado laboral.
ACCESIBILIDADE: MOITO POR CUMPRIR E POR LEXISLAR
Dende COGAMI exixen, como non podía ser doutro xeito, algo que debería estar garantido a día de hoxe e non é así, o cumprimento da lexislación vixente en materia de accesibilidade para eliminar as barreiras físicas e sensoriais en todos os ámbitos da vida e para que todas as contornas, produtos, bens, servizos, procesos e procedementos sexan universalmente accesibles.
Dende COGAMI piden así mesmo que se aprobe o decreto de accesibilidade en Galicia iniciado o seu proceso de validación en 2019 e actualmente aínda en fase de borrador, para que Galicia conte cunha norma actualizada, sendo a anterior do ano 2000. Outras medidas que urxen dentro da accesibilidade é a modificación da Lei de Propiedade Horizontal e crear un Fondo Estatal para a Accesibilidade Universal para aquelas persoas propietarias que non poidan asumir a súa porcentaxe de cota para as actuacións de mellora da accesibilidade.“É inaceptable que máis de 100.000 persoas en España vivan presas nas súas vivendas”, afirman.
