Dinámica nace da man de Mara González Lagoa e coa idea de ofrecer un espazo privado, íntimo e personalizado para facer todo tipo de eventos e celebracións fóra da casa ou da empresa –aniversarios, festas privadas, formacións, talleres, cursos…–. O local está na rúa Celso Emilio Ferreiro, 44 baixo de Monforte.
Segundo nos conta esta monfortina, a idea xurdiu “porque non había ningún negocio deste tipo en Monforte… noutros lugares como Bilbao está de moi moda este tipo de locais e quixemos traelo aquí”.
Preguntámoslle polo espazo que acondicionou para desenvolver as actividades comentadas e dinos que ten uns 116 metros cadrados. Dispón de cociña completa con lavalouzas, vitrocerámica, forno, neveira…. e con menaxe ata 50 persoas. Ten zona de xogos, tanto infantís como adultos –pizarra, futbolín, diana, xogos de mesa…–, televisión, wifi e dispositivo alexa para a música, así como tamén baños.
A QUE PÚBLICO OBXECTIVO LLE PODE INTERESAR?
Explica Mara que “está pensado para xuntanzas de xente que queiran facer aniversarios sorpresa, encontros, festas de benvida aos bebés… e no tema cumpreanos infantís a idea é orientalo quizás máis a ese grupo de idades nas que xa superaron o ‘parque de bolas’ e prefiren xuntarse cos amigos, comer unhas pizzas, xogar…”.
E para abranguer máis posibilidades dinos que o local “dispón dun proxector para xente que queira facer formacións, ou encontros de empresa”, e tamén que “outro tema por onde quero tirar é o mundo dos talleres e eventos propios, onde serei eu quen os impulse. Imaxínate, organizar algún taller de manualidades, de maxia, ou tamén facer algún evento íntimo cobrando entrada”.
Finalmente, a xerencia tamén baralla ofrecer aos clientes algúns servizos a maiores, xa sexa unha decoración especial, un catering para a ocasión, algún monitor, artista, etc.
QUE HAI QUE SABER, DE ENTRADA?
O horario de apertura inicial será de 9:00 da mañá ás 12:00 h. da noite e co tempo o obxectivo é que se poda alongar ata as 2:00 h. da madrugada.
Os alugueiros teñen unha fianza de 100 euros para cubrir danos, e os prezos irán en función do tempo, do número de persoas, etc. Por poñer algún exemplo orientativo, o prezo dun alugueiro por 4 horas para unha tarde entre semana sería de 95 euros, e a fin de semana algo máis caro; e de mañás poden ser 4 horas por 60 ou 70 euros.
Mara tamén nos explica que se esixirá que a xente que alugue o local deixe todo recollido, non lavado, e libre de lixo.
INAUGURACIÓN
Será este venres 27 de decembro e abrirase ao público a xeito de presentación entre as 19:30 e as 22:00 h. Haberá uns pinchos de cortesía.
