O actor e humorista de Quiroga, Alberte Montes, chegaba este venres 27 a Monforte co seu novo espectáculo ‘Patrón’. Un show que tamén se poderá ver o domingo 29 en Taboada ás 18:30 h. no Auditorio Cuartel Vello –Entrada de balde–.
Nun salón de actos da Casa da Cultura Lois Pereiro case cheo, o actor quirogués despregou as súas armas actorais e a súa afinada retranca, recursos que fixeron rir moito ao público asistente durante os 70-80 minutos que durou o espectáculo.
En representación do Equipo de Goberno do Concello de Monforte asistiron A Tenente de Alcalde, Gloria Prada, as Concelleiras de Cultura, Marina Doutón, Muller e Igualdade, Margarita López, e o Concelleiro de Tecnoloxía e Innovación, Guillermo Díaz. Felicitaron ao artista e desexáronlle moitos éxitos con este novo monólogo.
O ESPECTÁCULO
PATRÓN é un espectáculo moi especial. Unha homenaxe a esa figura icónica da cultura popular galega. Ese cabeza de familia, xefe da cuadrilla, ese pureta que se cre máis e con máis poder do que en realidade ten.
Alberte vaise facendo maior e cre estar entrando nun proceso de “empatronamento”. Tics, manías, xeitos de facer estanlle marcando o camiño. A súa vida cambiou un chisco nos últimos tempos. Vai quedando atrás o Alberte mozo, que saía un martes e non tiña resaca o mércores, que durmía máis cas mantas ou que non tiña que preparar o IVE trimestral.
Neste espectáculo, Alberte tamén renderá tributo ó patrón de referencia, seu pai.
