O colectivo Segredos de Pantón vén de facer público hai uns días o resultado do seu VII Certame de Fotografía de Nadal. Un concurso no que se convidaba a enviar imaxes outonais ou de comezo do inverno realizadas en paraxes do Concello de Pantón.
O primeiro premio foi para a instantánea titulada “Fresca noite”, realizada por Cristina Cardo, de Seragude na parroquia de San Xoán de Frontón. Levou un total de 56 votos. A tan só un voto quedou a imaxe premiada co segundo premio, “Augacaída”, que corresponde ao autor Diego Pérez e que foi sacada na coñecida e turística fervenza do Concello de Pantón. E xa en terceiro lugar quedou, con 38 votos, “Ponte entre freguesías”, realizada por Irene Laguno Baz na que se retrata a Ponte das Bidueiras, na parroquia de Santo Estevo de Espasantes.
Os gañadores levarán cadanseu lote de produtos e servizos cedidos por empresas e comercios locais e que se detallan nun artigo anterior de Xornal de Lemos.
Dende a organización agradecen a participación no concurso e a colaboración das empresas para poder ofrecer os agasallos aos gañadores. Así mesmo, amosan a súa satisfacción pola alta participación e polo disputadas que estiveron as votacións.
