Esta fin de semana Margaride de Lor, no Concello de Quiroga, estará de festas para honrar ao seu patrón, o San Vicente. O aperitivo, e nunca mellor dito, das mesmas é a coñecida ‘Festa do Chourizo’ que terá lugar o venres 24 a partir das 21:00 h.
Neste encontro que organiza a Asociación de Veciños de Margaride ofrécese unha gran pancetada e chourizada de balde para as persoas que se acheguen ata alí, non faltando tampouco o pan, o viño e un exquisito roscón de sobremesa. Trátase dunha festa cun encanto especial polo ben recibidos que son os forasteiros e o ben que presta unha panceta e un chourizo recén asados no lume, máis aínda nas frías noites de xaneiro.
Unha pequena fogueira recibe aos visitantes ao tempo que voluntarios e voluntarias da asociación asan chourizos nunha grella. A medida que a xente vai chegando dáselles un anaco de panceta, un anaco de pan, un vaso de viño e un espeto para que cadaquén ase a súa, e conforme van acabando esperan tamén para dar conta do seu chourizo. Un encontro gastronómico e socializador enxebre arredor do lume e cos espetos encarados uns con outros coa panceta na punta pingando e atizando as brasas coa súa propia graxa.
Como remate a esta merenda-cea, a organización ofrece roscón e convida a quedar á verbena, este ano da man do Grupo Taki/Cardia. A paparotada non se cobra, aínda que coñecendo o esforzo e a hospitalidade da Asociación de Veciños de Margaride, todo o mundo colabora coa comisión de festas coas consumicións e mercando rifas.
PROGRAMA DE FESTAS PARA A FIN DE SEMANA
Tras este aperitivo gastronómico e festeiro do venres, encárase o sábado 25 no que o día comezará cun pasarrúas a cargo do grupo de música tradicional O Recanto. A continuación, ás 13:30 h., terá lugar unha Misa Solemne e a procesión, para despois botarlle un vermú que estará amenizado pola orquestra Travesía, formación musical que se encargará tamén da festa e da verbena xa pola noite.
Chegando ao domingo 26, outro pasarrúas do grupo O Recanto a partir das 11:00 h. e repetimos coa Misa e a procesión ás 13:30 h. O grupo tradicional de Quiroga encargarase tamén de amenizar a sesión vermú nesta xornada dominical.
E xa para poñer o ramo, o fin de festa consistirá nunha ‘Gran chocolatada’ na Casa do Pobo, local social da Asociación de Veciños de Margaride de Lor.
