A 3ª edición do Camiño Creativo terá lugar os días 13 e 23 de abril coincidindo coa Semana Santa. Coincidencia que, en palabras de Gloria Prada, tenente de Alcalde de Monforte de Lemos, “consideramos un acerto que se elixiu a nosa cidade, Monforte de Lemos, e a Ribeira Sacra, para o comezo da 3ª edición do Camiño Creativo”. O apoio económico por parte do concello para esta actividade será de 5.000 euros e o da Deputación de Lugo de 10.000.
Previamente, a cidade de Monforte acollerá, do 11 ó 13 de abril o Encontro Nacional de Emprendedores Creativos, “que poñerá a súa énfase na creación dun ecosistema creativo e emprendedor na Ribeira Sacra, que servirá para apoiar ese obxectivo común polo que tanto estamos a loitar tanto, para que alcance a designación de Patrimonio da Humanidade pola UNESCO”, destacou Prada.
O CAMIÑO CREATIVO A SANTIAGO 2025
A 3ª edición do Camiño Creativo no Camiño de Inverno presentouse este martes en Santiago de Compostela, participando no acto, entre outras e outras autoridades, Anxo M. Lorenzo, representante da Consellería de Cultura, Lingua e Xuventude, a tenente de alcalde de Monforte, Gloria Prada; e a deputada de Réxime Interior, Promoción do Territorio e Turismo, Pilar García Porto.
A 6ª etapa transcorre por Monforte de Lemos e contará con 20 emprendedores que desenvolverán a súa idea de negocio ao tempo que percorren os 133,4 quilómetros da ruta xacobea entre esta cidade e Santiago de Compostela. Unha iniciativa que, segundo explicou Gloria Prada, “impulsa a creatividade, o talento e a innovación, potenciando o emprego e o autoemprego, a través do emprendemento no sector das Industrias Culturais e Creativas, e ligado á paisaxe”.
O Director Xeral de Cultura agradeceu este “orixinal e entusiasta pulo” á candidatura da Ribeira Sacra –cuxa documentación definitiva xa está entregada na sede da Unesco en París– difundindo o “importante patrimonio cultural que atesoura este tramo de Camiño”.
En palabras de García Porto, aplaudindo a iniciativa que apoia tamén o organismo provincial, “combinar a formación e o networking coa experiencia persoal nun entorno inspirador beneficiará, non só aos 20 emprendedores que se animen a formar parte desta iniciativa, tamén servirá de promoción do territorio e do Camiño de Inverno”.
No ano 2021, a cidade de Monforte acolleu outras xornadas organizadas por España Creativa e o concello, denominadas “O Camiño Creativo- Xacobeo 2021 emprende”, que reuniron a máis de medio cento de emprendedores.
