O Equipo de Goberno do Concello de Monforte aprobará este luns, 10 de febreiro, en Xunta de Goberno Local as bases que van regular as actividades do Entroido deste ano 2025, polo que que os interesados xa poderán inscribirse nos concursos de Xoves de Compadres, Xoves de Comadres e Martes de Entroido, unha vez sexan publicadas ditas bases e os formularios de inscrición na páxina web do Concello.
O primeiro dos eventos festivos programados para o Entroido monfortino é o concurso do Xoves de Compadres, que se vai celebrar o 20 de febreiro. Unha semana máis tarde, o 27 de febreiro, a cidade do Cabe acollerá outra das citas imprescindibles destas datas: o Xoves de Comadres. O Desfile de comparsas e disfraces do Martes de Entroido realizarase o 4 de marzo, e ó día seguinte, o mércores 5, terá lugar o Enterro da Sardiña.
Tanto para o concurso do Xoves de Compadres como para o de Comadres, a Concellería de Cultura de Monforte ten previstas tres convocatorias. Unha delas para os centros de ensino, outra para parroquias, barrios e rúas do Concello e por último, unha terceira de carácter individual, que concursará na Praza de España.
Os criterios que seguirá o xurado para determinar os gañadores terán en conta a orixinalidade dos materiais empregados e tamén se vai valorar a montaxe, a elaboración e os materiais utilizados, o interese etnográfico e a crítica social. Cómpre destacar que cada un destes criterios terá unha valoración mínima do 10% e a máxima será do 25% do total da puntuación.
Tanto no caso do Xoves de Compadres como no de Comadres, os premios para cada unha das convocatorias son os seguintes, tendo unha partida máxima de 2.000€ tanto para o concurso de Compadres como para o de Comadres:
Individuais:
1º premio: 100 euros
2º premio: 75 euros
Accésit: 50 euros
Colectivos:
1º premio: 150 euros
2º premio: 120 euros
Accésit: 75 euros
Outros premios:
-Premio á etnografía: 150 euros
-Premio á crítica social: 150 euros
As solicitudes para inscribirse no concurso do Xoves de Compadres terán que presentaranse no Rexistro Xeral do Concello ou a través da Sede Electrónica do mesmo, dende o día seguinte á súa publicación na páxina web do Concello. O prazo para facelo rematará o vindeiro 19 de febreiro ata as 14 horas.
No caso do Xoves de Comadres, xa está tamén o prazo aberto e o último día para inscribirse é o 27 de febreiro ata as 14 horas.
Martes de Entroido: Desfile de comparsas e disfraces
O día grande do Entroido en Monforte será o martes 4 de marzo, para o que poden inscribirse ata o 28 de febreiro ás 14 horas.
O Concello establece dúas modalidades: para as comparsas e disfraces de Monforte de Lemos e outra para disfraces e comparsas de fóra do Concello. Neste caso, destínase unha partida máxima de 17.850€ para Comparsas e Disfraces de Monforte, e de 3.150€ para Comparsas e Disfraces de fora de Monforte. Haberá premios de 300 euros para a mellor comparsa tradicional, para a mellor posta en escena e a mellor música en vivo, mellor humor e mellor crítica de actualidade.
O Desfile de Comparsas e Disfraces comezará o martes 4 de marzo ás 17:00 h na praza da Estación. Percorrerá as rúas Calvo Sotelo, Roberto Baamonde, Cardeal Rodrigo de Castro e finalizará na praza da Compañía.
O xurado cualificará as comparsas na praza da Estación de 16:00 a 17:00 h. Os disfraces individuais concentraranse obrigatoriamente na praza da Estación ás 16:30 h, onde o xurado as identificará. Logo, tanto as comparsas como os disfraces serán cualificados por lugares indeterminados do percorrido. Os criterios que seguirá o xurado para determinar os gañadores terán en conta a orixinalidade dos materiais empregados e tamén se vai valorar a montaxe, a elaboración e os materiais utilizados, o interese etnográfico e a crítica social. Cómpre destacar que cada un destes criterios terá unha valoración mínima do 10% e a máxima será do 25% do total da puntuación.
