A profesora de lengua española Mª Eugenia Conde Noguerol (Facultade de Filoloxía da Universidade da Coruña) vén de impartir ao alumnado de 1º de Bacharelato unha práctica e moi interesante conferencia sobre “Los corpus lingüísticos: el secreto para entender el uso real de la lengua”.
Neste obradoiro afondou no fascinante mundo dos corpus lingüísticos para descubrir como se comportan as palabras en contextos reais e ao longo do tempo. Comentou tamén que ao analizar grandes conxuntos de datos textuais, denominados corpus, podemos observar o uso auténtico da lingua en diferentes ámbitos: dende as conversas cotiás ata o seu emprego nos medios de comunicación.
VER A LINGUA EN ACCIÓN, ALÉN DO QUE APARECE NOS DICCIONARIOS
O obxectivo deste obradoiro foi amosarlle ao alumnado como o corpus permite ver a lingua en acción, alén do que aparece nos dicionarios ou regras gramaticais. Conde Noguerol explorou como as palabras comúns cambian de significado segundo o contexto, como xorden novas expresións e o que podemos aprender dos patróns léxicos e gramaticais da fala real.
Empregando ferramentas dixitais sinxelas, sobre todo da Real Academia Española, e exemplos prácticos, a relatora analizou co alumnado con detalle algunhas palabras, observando o seu uso. Ao remate do obradoiro, os participantes puideron aplicar estas ferramentas para explorar o comportamento das palabras que lles interesaron, máis abertos a considerar este método científico como unha posibilidade para o estudo da lingua.
Dende a dirección do IES A Pinguela calificaron de moi atractiva e interesante para o alumnado esta sesión divulgativa e como detalle importante do currículo de Mª Eugenia Conde Noguerol, comentan que “traballou na RAE e impartiu clases de Español en Etiopía e Malaisia. O seu traballo de investigación trata precisamente sobre os corpus lingüísticos, esenciais actualmente tamén para a intelixencia artificial”.
