RENFE vén de ceder unha peza ferroviaria histórica este xoves 13 de febreiro ao Museo do Ferrocarril de Galicia (MUFERGA), en Monforte de Lemos. Trátase dun tractor de manobras que se atopaba apartado nos talleres de Enxeñería e Mantemento de Ourense e que, dende hoxe, volverá estar operativo.

Este tipo de tractores foron construídos a principio dos anos sesenta para efectuar servizos de movemento de material en estacións e depósitos ferroviarios. A cesión desta máquina supón que volva ter actividade realizando tarefas especializadas na rede viaria interior do MUFERGA.

Con esta doazón, din dende RENFE, “preténdese achegar á cidadanía a preservación e restauración dun material ferroviario histórico que se poderá visitar, unha vez finalizado o seu traslado, no Museo do Ferrocarril de Galicia da localidade monfortina”.