A Xunta de Goberno da Deputación de Lugo aprobou este venres 14 de febreiro a listaxe de entidades admitidas na quinta edición do programa Coñece a túa provincia. Así o informou a Voceira socialista do Goberno e Deputada de Réxime Interior, Promoción do Territorio e Turismo, Pilar García Porto, que sinalou que este programa de viaxes gratuítas destinado a entidades sen ánimo de lucro da provincia de Lugo “está a ser un éxito rotundo”.

“as prazas esgotáronse en só 14 minutos”

“Desde que arrancou a iniciativa, no 2021, xa viaxaron pola provincia preto de 10.000 persoas, de 438 colectivos, e ten xerado un retorno económico de máis de  600.000 €”, destacou García Porto. Subliñou que por quinto ano consecutivo quedan completas as prazas dispoñibles, sendo beneficiarias 132 asociacións, e quedando na listaxe de agarda 201 entidades. Foi tal a rapidez de rexistro de solicitudes dende que empezou a contar o prazo, comentou tamén a deputada, que “as prazas esgotáronse en só 14 minutos”. A quinta convocatoria do programa Coñece a túa provincia ofrecerá un total de 3.036 prazas.
 
En relación ás solicitudes, publicaranse as listaxes de admitidas, en agarda ou non admitidas, no Boletín Oficial da Provincia nos vindeiros días. A Deputada de Turismo valorou que “este é un programa que puxemos en marcha dende a Deputación de Lugo para fomentar o coñecemento da nosa riqueza patrimonial entre os propios veciños e veciñas da provincia e, ao mesmo tempo, para incentivar o turismo de proximidade e apoiar ós sectores hostaleiro, turístico e comercial”.