Don Bernardino de Amandi amosa o seu potencial na Guía de Viños, Destilados e Adegas de Galicia 2025 acaparando 8 distincións para as súas elaboracións. Delas, salientar ‘A Capona’, “a última leira de Amandi” que a adega acaba de sacar ao mercado e que se estrea cun Gran Ouro, e ‘Vacamulo’ referencia que volve ser por segundo ano consecutivo o tinto de Galicia mellor puntuado nesta guía. Nela este viño é definido como O Poderío da Ribeira Sacra: “Intenso, profundo, insondable, teno todo, froita (ameixa vermella, amora, érbedo, selecta, etc), sutil e excelente crianza (moca, bombón inglés, sándalo). En boca é poderoso e xeneroso en sensacións, toda a froita coa frescura dun territorio único (terracota), longo, moi longo e firmemente profundo”.
Diego Rodríguez, “5ª Xeración” de Don Bernardino, congratúlase do bo traballo que está a facer a adega para seguir vinculando os seus viños de Amandi á máxima calidade, “con Vacamulo levamos 3 anos no mercado e os tres anos foi Gran Ouro na Guía Paadín, os dous últimos foi ademais o mellor tinto de Galicia, o mellor valorado. Para nós é unha honra”.
Ademais dos 2 Gran Ouro comentados, cinco viños tintos de Don Bernardino obteñen Ouro+ nesta edición da Guía Paadín: Don Bernardino 2023,Don Bernardino 4ª Xeración 2020,,Ibio 2021, Melanio A Capitá 2019, Don Bernardino Leira Mezquita 2019.
“Todos os nosos tintos están por encima do ouro o que significa que a zona de Amandi está por encima da media. Demostra a aposta de Don Bernardino por poñer en valor os grandes viños de Amandi, mentres estes recoñecementos impulsan a nosa presenza no mercado”, asegura Diego Rodríguez. O palmarés de Don Bernardino na Guía Paadín 2025 complétase con Don Bernardino branco 2023 que recibe un Ouro.
Guía de Viños, Destilados e Adegas de Galicia
A Guía de Viños, Destilados e Adegas de Galicia é unha publicación de carácter anual promovida polo catador e enólogo Luis Paadín, ao que agora tamén acompaña o seu fillo, Alejandro Paadín.
A Guía consolidouse hai 15 anos como referente para profesionais do sector e amantes do viño e os destilados de Galicia, que se achegan a través dela todo o máis destacado do sector. O seu éxito radica na rigorosidade das súas notas xa que os catadores non coñecen as etiquetas, tampouco se permite ningún tempo de publicidade na guía, o que dá valor, profesionalidade e humildade ao texto.
