A carpa na que se celebra a 42 Feira do Viño de Chantada acolleu o sábado 8 de marzo ás 12:00 h. o manifesto para conmemorar o ‘Día Internacional da Muller’. A encargada da súa lectura foi a concelleira de Igualdade do Concello de Chantada, Pamela Fernández.

Empezou dicindo que “as mulleres necesitamos ser escoitadas, recoñecidas e valoradas polo noso traballo e polas nosas capacidades”, e reivindicou o importante papel da muller viticultora, papel tan importante como o do home pero “moito menos visible”.

E continuou: “As mulleres en Galicia sempre traballamos no campo, pero con dobre carga, porque a casa tamén era a nosa competencia. A muller posuía terras, pero o que facía os tratos ou a parte visible dos negocios era o home. Afortunadamente isto está a cambiar e por fin estamos a recuperar os espazos perdidos. As mulleres poden e deben ocupar calquera posto na adega e no proceso de elaboración do viño: comerciais, enólogas, vitucultoras ou postos de dirección”.

No discurso loubou a importancia da muller nas comunidades, afirmando que fixa poboación a través de prácticas e ritos de transmisión oral compartidos xeracionalmente, e animou a dicir “forte e claro que as mulleres si queremos frear as desigualdades e esiximos un cambio estrutural”.

Como remate, o manifesto enumerou en dous bloques separados o que SI e o que NON queren as mulleres:

AS MULLERES NON queremos:

-Non queremos ser obviadas na linguaxe, nin no oral, nin no escrito!

-Non queremos ser cousificadas. Os nosos corpos non son territorio de conquista, nin obxectos suxeitos á opinión doutras persoas. Non somos obxectos nin mercadorías, somos persoas autónomas, suficientes e estamos fartas de prácticas sexistas e estereotipos que condicionan cara unha forma de ser e de existir.

-Non queremos ser utilizadas. Estamos cansas de esforzarnos nos nosos traballos e logo ser privadas do recoñecemento do mesmo.

-Non queremos simulacións en materia de igualdade. Necesitamos que os pasos que se dean sexan verdadeiros; que as políticas públicas en materia de igualdade aborden os retos e desafíos reais que enfrontamos as mulleres no día a día.

-Non queremos traballos precarios, con soldos que non cheguen a final de mes. Tampouco queremos recibir un menor salario que un home por un traballo igual. Nin ser estigmatizadas no traballo por solicitar permisos para realizar tarefas de coidados.

-Non queremos maternidades forzadas. Ser nai ten que ser un exercicio libre e que non se nos cuestione por non querer selo. Rexeitamos as cargas mentais por non corresponder ao tipo de muller ideal que a sociedade nos trazou.

-Non queremos que as tarefas de coidados recaían en nós exclusivamente. Non queremos ese traballo invisibilizado que nos obriga a cumprir unha dobre e, ata unha triple, xornada.

-Non queremos vivir violencias machistas, nin máis agresión sexuais.

-Non queremos actuacións omisas por parte das institucións. Tampouco unha sociedade negacionista das desigualdades de xénero que constrúa vínculos baseados na violencia e na xustificación das violencias machistas.

AS MULLERES SI queremos:

-Traballar coordinadamente en condicións de traballo que garantan a igualdade salarial e o empoderamento das mulleres;

-Queremos romper o teito de cristal e combater as prácticas sexistas en todos os ámbitos;

–Queremos sensibilización a todos os niveis en materia de igualdade;

-Queremos homes corresponsables e espazos de traballo que permitan a conciliación.