Baixo o lema “Volver e crer no rural” esta quiroguesa falará sobre a importancia de transformar o negativismo en ilusión para revitalizar o rural. Aída regresa á súa aldea natal e pone en marcha, Imprenta Medios, unha imprenta dixital e publicidade, a primeira empresa deste tipo que se instala no municipio de Quiroga.
Natural de Bustelo de Fisteus marchou a Vigo onde entrou en contacto co mundo das Artes Gráficas e a Publicidade, sendo hoxe empresaria do sector. Sen perder o contacto coas súas raíces marcouse o reto de axudar a recuperar e darlle vida á súa aldea, que dende o 2021 foi recoñecida pola Xunta como Aldea Modelo.
Moderado polo concelleiro de Servizos Sociais, Xosé Manuel Fernández Montes, neste faladoiro que se desenvolve na Biblioteca do centro Social coñecerase de primeira man as experiencias desta empresaria e impulsora do rural.
O Faladoiro é unha actividade que promove o Concello de Quiroga dende a Concellería de Servizos Sociais e Participación Cidadá que busca crear un espazo de socialización e de coñecemento. Partindo dun tema a tratar e dunha persoa convidada, os asistentes poden intervir para coñecer máis á relatora ou relator, para aprender, e incluso para compartir as súas propias experiencias.
