Úrsula Rial é unha rapaza orixinaria de Nigrán que chegou ao Courel no 2022, conmovida polos terribles lumes que houbo ese verán. Coñeceu a Xan de Vilar e, con outra xente, preocupáronse por el e por facer cousas como contribuír á recuperación do seu museo etnográfico.
Rial ten unha destacada formación musical. Estivo na Etrad (Escola Municipal de Música Folk e Tradicional) e o Conservatorio de Vigo sendo a única requinteira en acadar o Diploma como Mestra Profesional no ano 2016. Ademais, forma parte do proxecto musical coñecido como “Estatalá”, unha formación de estilo folk amante dos ‘bailes do mundo’.
Tras uns anos no Courel, concretamente en Froxán, comenta Úrsula que foi “estudiando o que lle podía facer falta á xente” e ao ver a Igrexa de Seoane pensou que esta podía ser un nexo de unión para algún proxecto. Así naceu a idea de crear corais no Courel pois falando con xente das parroquias pareceulles un tema atraente. Di tamén a nosa interlocutora que levando dous anos en xuntanzas veciñais, no Entroido mesmo, xa coñece moita xente e vaise sabendo do proxecto.
UN PROXECTO INTERESANTE E INNOVADOR
O proxecto, bautizado como “Obradoiros Corais no Courel”, trata de xuntar, en palabras de Úrsula “ás voces nas Capelas das Parroquias do Courel e nas súas veciñas de Pedrafita, Quiroga, O Incio, Samos, Sarria, Monforte de Lemos, A Pobra do Brollón, O Barco de Valdeorras, A Rúa… e así concluír cun pequeno Circuíto de Corais coas que poder interactuar entre elas, xuntarse nos certames, festas, romarías…”.
Esta iniciativa irá asociada, di tamén, ao deseño de camisetas e rifas coas que apoiar á “reconstrución de pezas” para o “Museo Xan de Vilar” do Courel, aldea que foi arrasada polos lumes no ano 2022.
Úrsula non está soa nisto, di contar cun grupiño de xente activa das aldeas, e convida á participación. Fai un chamamento ás persoas interesadas en que se organicen estas “Corais no Courel” nas súas Capelas para que chamen ao teléfono 698948539. A idea é ver a evolución da proposta e cadrar horarios e rutas para que se poida levar a cabo a iniciativa.
Ademais dun interesante proxecto socializador e dinamizador do rural, a idea desta rapaza é “voltar aos vellos Templos que foron sagrados para as nosas transmisoras da oralidade”.
PRESENTACIÓN OFICIAL
As primeiras xuntanzas serán o vindeiro 13 de abril, ás 12 e ás 18:00 h. no Templo Motivo de Seoane do Courel. E pola noite, a partir das 22:00 h., o dúo musical “Estatalá” (Úrsula Rial e C.C. Quintá) agasallará aos presentes cun concerto no Bar Rafael, lugar no que tamén se escoitarán os poemas de Xesús Parada Jato e se poderá ver escultura de Domingo de Vilamor.
AGRADECEMENTOS
Úrsula, ilusionada con este proxecto, quere deixar públicos uns agradecementos a Teresa de Seoane, ao Párroco Jesús, a Xesús Alfonso Parada Jato, de Meiraos, e a Jessenia do “Bar Rafael” pola acollida.
