O Alcalde de Monforte, José Tomé Roca, inaugurará este sábado día 5 de abril ás 11:30 horas o “Mercado para a Medieval” no espazo anexo da Praza de Abastos de Monforte. Trátase, en palabras do rexedor, “dun certame co que buscamos potenciar e promocionar a Feira Medieval, un evento turístico que trae unha gran afluencia de público e visitantes a Monforte durante a fin de semana da Semana Santa”.
Ademais da inauguración deste mercado, terá lugar unha rolda de prensa aberta aos medios para presentar o Programa oficial de actividades da Feira Medieval que este ano alcanza a súa 21ª edición celebrándose na fin de semana do 19 e 20 de abril.
MERCADO PARA A MEDIEVAL
O Mercado para a Medieval é un preludio da Feira Medieval, polo que a súa temática xira arredor da preparación para dita Feira. Contará coa presencia de 11 stands nos que haberá traxes medievais confeccionados a man para adultos e nenos, complementos para os traxes, artesanía, bixutería, decoración de mesas de terraza para hostalería así como decoración de mesas medievais de comedor, en definitiva, os preparativos para a Feira Medieval.
O sábado día 5 celebrarase un dos actos centrais do Mercado Medieval, o Desfile de Traxes Medievais e complementos, que terá lugar ás 18:30h. con entrada libre e como novidade, este ano, estenderá o percorrido do desfile pola rúa, ata a entrada do espazo gastronómico, dada a gran afluencia de público que tivo en edicións anteriores. Desfilarán 92 traxes de época, presentados por 23 modelos, adultos e nenos, e terá unha duración aproximada dunha hora.
Aproveitando a celebración deste Mercado, proxectarase, de manera continuada, o vídeo oficial da Feira Medieval, que foi presentado o pasado luns 31 de marzo, e o vídeo “O bo xantar”, o cal dará a coñecer a proposta culinaria dos diferentes restaurantes da cidade para esta Feira Medieval.
Tamén se fará o concurso de repostería e pastelaría “A polo mellor doce” onde os visitantes poderán avaliar o mellor doce dos expostos durante o Mercado, votando durante a xornada do sábado no horario do mercado, tres categorías: tradicional, innovador e creativo, votación da que resultará elixido un gañador de cada unha das categorías. A entrega de premios terá lugar o domingo día 6 de abril ás 13:00 h no propio mercado e a continuación realizarase un sorteo entre todos os votantes dos doces expostos.
HORARIO DO MERCADO
Sábado de 11:00h. a 14:00h. e de 17:00h a 21:00h. e domingo de 11:00h. a 14:00h. e de 17:00h a 20:00h.
