A adega Regina Viarum, no corazón da Ribeira Sacra, será o escenario dunha nova presentación literaria que se realiza baixo o ciclo “Lecturas con denominación de orixe”, iniciativa que busca unir lectura, viño e paisaxe e que organiza a Libraría Agrasar.
O evento está programado para o sábado 10 de maio ás 20:30 h. e a obra que se dá a coñecer ao público é “El miedo”, da autora María Hesse, quen estará acompañada no acto pola escritora María Sánchez. Ao remate do mesmo, ademais de poder mercar o libro –que poderá ser asinado pola escritora– poderase gozar duns petiscos e dun viño por xentileza da adega colaboradora.
Este ciclo, “Lecturas con denominación de orixe”, busca ofrecer unha alternativa orixinal ás presentacións tradicionais. A idea é ‘maridar’ viño, paisaxe e lectura para goce daquelas persoas que teñan paixón, tanto pola lectura como polos bos caldos.
A AUTORA
María Hesse é unha das autoras e ilustradoras máis recoñecidas do panorama editorial actual. O seu estilo artístico e narrativo conectou especialmente cun público lector feminino, tanto xove como adulto.
A súa obra foi traducida a máis de 10 idiomas e publicada en países como Francia, Italia, Estados Unidos, Corea ou Brasil. Foi tamén recoñecida por medios como El País, Vogue ou El Cultural, e colabora habitualmente con editoriais de prestixio como Lumen, e para medios escritos como El País e Jot Down.
RECENSIÓN DA OBRA
Cal é a orixe dos nosos medos e como podemos exorcizalos? Neste libro, visceral e fermosísimo, María Hesse plántalle cara aos seus propios temores: os que a acompañaron ao longo da súa vida, como a tantas outras mulleres. Así, cunha linguaxe íncreiblemente visual e alegórica, van desfilando por estas páxinas a ansiedade, a manipulación, a precariedade, o cambio, a soidade, a tolemia, a maternidade, a vellez ou a morte nun libro que mestura a autoficción, elementos de cómic e referencias literarias, poéticas e musicais.
Nesta obra María Hesse renova o seu estilo narrativo e artístico para confeccionar a súa obra máis madura.
