O mandatario provincial, José Tomé, puxo en valor o labor do Consorcio de Turismo da Ribeira Sacra e recordou que manteñen un servizo permanente de consultoría para os concellos e os axentes privados deste territorio, “revisan o estado da sinalización, a xeolocalización dos recursos turísticos ou a distribución de material promocional e informativo a todos puntos de información turística da Ribeira Sacra e do resto da comunidade galega, entre as súas actuacións”.

O Consorcio tamén participa activamente nos trámites da Candidatura da Ribeira Sacra a Patrimonio da Humanidade e asume funcións e partidas do Plan de Xestión de Paisaxe Cultural Ribeira Sacra. A proposta, reformulada baixo un novo enfoque que se centra na paisaxe cultura da auga, avaliarase o vindeiro ano. O mandatario provincial lembrou a implicación da Deputación de Lugo na consecución desta distinción internacional.

Tomé Roca destacou ademais que “potenciar o turismo da provincia é unha das liñas que vertebran a acción do noso goberno. Por iso, apostamos por un modelo de turismo sostible, de calidade, non masificado, e que se centra na experiencia das persoas que nos visitan”.