Este xoves, 22 de maio, terá lugar ás 19:30 h. a segunda xornada da segunda edición do Marida Maio, un evento patrocinado pola Deputación de Lugo e que ten como escenario o Centro do Viño da Ribeira Sacra de Monforte. A organización corre a cargo da Asociación Provincial de Empresarios de Hostelería de Lugo (Apehl).

O Marida Maio é unha iniciativa que mestura gastronomía e turismo implicando a diversas empresas da comarca que achegan os seus produtos e servizos para dalos a coñecer ao público asistente que accede ao encontro previa reserva no teléfono 982 412 050.

Na segunda sesión desta edición colaborarán o restaurante monfortino La Table d’Arnaud, as adegas Galanteiro e Soutelo, a marca de aceite de Quiroga Aceiroga e as empresas de ocio Bikarte Ribeira Sacra e Solpor Camperpark de Sober. Ademais, haberá música en directo, coa actuación do solista Richard.