A acción consistiu no despregamento de bandeiras palestinas con algunhas galegas na “ponte vella”, a da antiga N-120, un símbolo de unión entre ríos e comarcas que serviu de arteria de comunicación histórica para o pobo galego.
Case un cento de persoas participaron no acto, entre as que se atopaban representantes institucionais, cargos orgánicos do BNG e membros de colectivos sociais e culturais das comarcas que se xuntan nos Peares. Entre eles, estiveron o Deputado do BNG por Ourense Iago Tabarés, e os portavoces nacionalistas en diferentes localidades como Monforte de Lemos, Pantón,Bóveda, Taboada, Ribadavia, Coles.
“Escollemos Os Peares precisamente por ser un punto de encontro, unha arteria e vía de comunicación histórica na que o río sempre foi unión, e iso é o que queremos construír: paz, unidade e solidariedade fronte á inxustiza e a barbarie”, explica Rosana Prieto Florines, responsable comarcal do BNG no sur de Lugo e portavoz na corporación de Pantón que foi quen deu lectura a unha Declaración Política na que se esixiu o “cesamento do fogo e parar o xenocidio sobre o pobo palestino”, e lembrou a necesidade dunha solidariedade activa da sociedade fronte á inxustiza, e á complicidade internacional.
Concentración apoio a Palestina nos Peares / BNG
O BNG manifestou a súa “condena rotunda e sen ambigüidades” á política de violencia e exterminio levada a cabo por Israel, que nas últimas horas anunciou unha nova ofensiva “sen precedentes”, comezando cun bombardeo sobre unha escola que servía de refuxio para civís. “A situación en Gaza é insostible. Máis de 16.000 crianzas foron asasinadas en 19 meses. Isto é un xenocidio e non se pode relativizar”, denunciou Prieto Florines, quen tamén criticou a “hipocrisía” do goberno español por tentar capitalizar o recoñecemento do Estado Palestino sen romper os acordos militares con Israel, así como o “silencio cómplice” da Xunta de Galicia.
“A causa palestina non é só unha cuestión de dereitos humanos, que tamén. É unha loita pola liberdade, pola dignidade e pola existencia dun pobo que leva un século sufrindo opresión e expulsión e aniquilación” lembran desde a organización frontista. O acto rematou cun chamamento á sociedade galega e á comunidade internacional a traballar activamente por unha solución política e pacífica, xusta e duradeira baseada no respecto ao
dereito internacional e na fin da ocupación.
O BNG comprometeuse a seguir apoiando a causa palestina desde todos os espazos, “da mobilización social ao traballo institucional”, porque “só desde o compromiso firme coa paz e coa solidariedade internacionalista se pode construír un futuro xusto para todos os pobos” conclúen.
Concentración apoio a Palestina nos Peares / BNG
