Xa se coñece o cartel gañador das Festas Patronais da cidade de Monforte, que terán lugar do 11 ao 16 de agosto de 2025. A presentación oficial foi este 14 de xuño na Casa do Concello, dando así a coñecer o autor que levará os 1.000 euros de premio tras considerarse a súa creación como a mellor da trixésima edición do concurso de carteis
No acto, o Alcalde estivo acompañado pola 1ª Tenente de Alcalde, Gloria Prada; a Concelleira de Cultura, Ensino e Xuventude, Marina Doutón; e polo gañador do concurso, José Ángel Ligero Martínez quen explicou en que se inspirou para a realización do cartel e o que quixo transmitir co deseño gañador do certame.
Este ano presentáronse 20 traballos artísticos, un número moi elevado que xa no ano anterior, no 2024 se incrementou nun 33% máis que en edicións anteriores o que demostra, para a organización “o interese dos artistas por este tipo de concursos”.
Todos os carteis que se presentaron a concurso serán expostos a principios de agosto na Casa da Cultura de Monforte, e unha vez remate dita exposición, os autores non premiados poderán retirar os seus carteis se así o desexan.
O CARTEL GAÑADOR
O xurado estivo composto por seis persoas de ámbitos sociais, educativos e culturais monfortinos diferentes, así como pola Concelleira de Cultura, Marina Doutón, que actuou como Presidenta do mesmo.
O Alcalde de Monforte, José Tomé, referiuse á obra gañadora dicindo que “no conxunto do cartel predomina a estética colorista a través dunha ampla gama cromática de cores alegres, especialmente os vermellos, verdes e azuis. Neste senso, creo este cartel é unha explosión de alegría e cor, como o foi nos últimos anos, unha estética que gusta ó noso xurado porque o cartel das festas debe transmitir a alegría, a felicidade e a vitalidade das nosas festas”.
Por outra banda, para o gañador do concurso, José Ángel Ligero Martínez, o traballo gráfico realizado tiña como obxectivo “transmitir a ledicia, o color e a festa nun deseño cheo de forza. Unha imaxe icónica da cidade claramente representativa, onde cada color, cada casa representa unha veciñanza unida polas festas. Todo esto fusionado, reflexando o espirito de unión da cidade e adornado con fogos artificiais”.
O Alcalde, no remate do acto, trasladou o se agradecemento á empresa Gadis pola súa colaboración neste concurso, así como na posterior impresión dos carteis das Festas Patronais, e tamén á Deputación Provincial de Lugo pola achega económica que fai a través do Plan Deputación de Cooperación cos Concellos.
