A asociación veciñal do Saviñao solicita a aplicación da lei 3/2007 do 9 de abril de prevención e defensa contra os incendios na Comunidade Autónoma, así como da consecuente ordenanza municipal, segundo a cal o concello debe avisar ás persoas propietarias para que manteñan limpas as súas propiedades.

De non realizarse esta limpeza, o Concello debe aplicar a “execución subsidiaria” contemplada no artigo 22.3 da devandita lei, que capacita ao concello a realizar os traballos de roza e a posterior facturación dos custos ás persoas propietarias. “Esperando a aplicación da lexislación vixente por parte da Alcaldía e en beneficio de toda a colectividade”, conclúen.