O Concello de San Xoán de Río visibilizará o seu territorio, iniciativas e potenciais este sábado 28 de xuño nunha xornada especial que terá como escenario o Centro Comercial Ponte Vella de Ourense e que busca tender pontes entre o mundo rural e o urbano. Será entre as 11:00 e as 13:00 h. e a iniciativa leva por título: “Día de San Xoán de Río”.
O evento terá lugar no segundo andar do centro comercial, nun espazo estratéxico onde conflúen diariamente milleiros de persoas da cidade e da contorna rural.
TRES EIXOS PARA AMOSAR SAN XOÁN DE RÍO
Eixo social: presentación do proxecto europeo “Mulleres de Río”, cunha actuación coreográfica que visibiliza a diversidade e o papel da muller no rural.
Eixo gastronómico: degustación gratuíta de produtos locais (tenreira, viño, embutidos, bica, mel ou cosmética natural) aproveitando a promoción da III Festa da Tenreira de San Xoán de Río.
Eixe da lonxevidade: exposición da filosofía de vida do concello, recoñecido pola súa poboación especialmente lonxeva, e mostra de produtos vencellados á saúde e ao benestar natural.
A xornada está aberta a toda a cidadanía e contará con presenza institucional, actuacións, mostra de produtos, puntos informativos e degustacións.
FORMATO DE COLABORACIÓN NOVIDOSO
“Este evento supón un formato pioneiro de colaboración institucional, aproveitando a singularidade do Centro Comercial Ponte Vella, un dos poucos de España propiedade dos propios comerciantes locais”, comenta o rexedor do concello protagonista.
A celebración do evento nun centro comercial urbano pretende: Achegar o rural a novos públicos e contextos; visibilizar o talento, os produtos e os servizos que existen a menos dunha hora da cidade; e xerar oportunidades comerciais, sociais e culturais que favorezan tanto a comerciantes como a produtores, profesionais ou emprendedores rurais.
En palabras do alcalde, Xose Miguel Pérez Blecua, “San Xoán de Río quere abrir unha ventá ao rural galego, pero tamén establecer conexións duradeiras. Este evento é un primeiro paso para demostrar que hai futuro compartido entre cidade e territorio, se nos atopamos no medio”.
