O evento, no marco da celebración do Orgullo, reuniu a unhas 30 persoas na zona arborada do Malecón para abordar, desde a psicoloxía e o dereito, as vivencias e retos que afronta o colectivo LGTBIQA+. As poñentes, Diana Buceta, avogada especializada en dereitos fundamentais e Cristina Vieco, psicóloga xeral sanitaria, abordaron cuestións como:

• A diversidade afectiva, sexual e de xénero.
• Ferramentas legais e recursos de apoio.
• O autocoidado e a saúde emocional como dereito.
• A importancia de crear espazos seguros e libres de odio.

Ademais da formación e o debate, o acto serviu tamén como punto de encontro para tecer redes. Comezaron a xurdir conversas arredor da creación dunha asociación LGTBIQA+ en Monforte, así como da posibilidade de impulsar iniciativas no pleno municipal para garantir atención integral dende os servizos sociais e visibilidade real do colectivo na vida pública da cidade.

Desde o BNG de Monforte agradece a partiticipación e o compromiso, sensibilidade e rigor das relatoras, “Continuaremos a traballar para facer de Monforte un espazo diverso, inclusivo e libre de violencias. A igualdade non se celebra un só día, constrúese todos os días, desde o coñecemento, o apoio mutuo e o coidado colectivo”, conclúen.