Dende o Servizo de Atención Temperá tiveron a iniciativa de reunir a todos/as os nenos e nenas usuarios do servizo e as súas familias, para gozar dunha xornada de convivencia no centro de Quiroga, no barrio da Ribeira, entre as 16:00h e as 19:00h deste 3 de setembro.
Estas xornadas, nas que se convida ás familias, tanto se pertencen o servizo na actualidade como se formaron parte del nalgún momento dende a súa creación, o principal obxectivo e manter o espirito de comunidade entre as familias, os menores e os profesionais que forman parte do servizo.
Trátase de fortalecer deste xeito o vínculo entre estes e amosarlles ás familias que o Servizo de Atención Temperá e os seus profesionais sempre estarán aí para o que precisen. A xornada serve tamén para agradecer a confianza depositada polas familias na Dirección e no Equipo Técnico que traballa no servizo, ofrecéndolles un tempo para compartir as súas inquedanzas e dúbidas, ademais de pasar unha tarde de lecer compartido. Contarase con xogos e actividades dirixidas e amenizadas polos profesionas de Psicoloxia, Logopedia e Terapia Ocupacional que traballan no centro; e tamén merenda e conversas socializadoras.
SAT QUIROGA
O servizo entrou en funcionamento en setembro do 2020, co nome de Servizo de Atención Temperá da comarca de Quiroga, atendendo aos nenos e nenas de 0 a 6 anos con trastornos do neurodesenvolvemento -ou en risco de padecelos- e ás súas familias. En febreiro de 2021 establécese un novo convenio cos concellos de Sober, O Saviñao e Bóveda, polo cal quedan incluídos no novo Servizo. En outubro dese ano súmanse tamén A Pobra do Brollón e Pantón.
Na memoria do servizo do pasado 2024, recóllense 5 profesionais (2 psicoloxía, 2 logopedia, 1 terapeuta ocupacional) cun aumento no número de sesións de valoración –pasando de 205 a 283–, e no número de nenos/as atendidos/as con sesións individualizadas pasando de 94 usuari@s no 2023 a 111 no 2024. Ademais, a día de hoxe, non hai lista de agarda.
Os concellos con máis usuari@s no 2024 foron O Saviñao (33,4 %) e Quiroga (28,8 %), seguíndolle A Pobra do Brollón (9 %) e Folgoso do Courel (7,2 %). E as especialidades con máis demanda foron logopedia (39,28 %) e Psicoloxía (33,06 %).
Dende o 5 de xullo de 2023, o Director do SAT é Xosé Manuel Fernández, concelleiro de Servizos Sociais.
