O Sindicato Labrego Galego-Comisións Labregas (SLG-CCLL), en colaboración coa Vicepresidencia da Deputación de Lugo, poñerán o peche estes días ás xornadas de charlas e conferencias iniciadas o pasado 29 de agosto. Estas xornadas teñen como obxectivo informar e dar voz ao sector analizando a situación da vendima deste 2025 na Ribeira Sacra e reflexionando sobre o futuro do mesmo.
DERRADEIROS ENCONTROS
Este venres 5 de setembro, ás 12:00 h, o Centro do Viño da Ribeira Sacra de Monforte de Lemos, acollerá unha conferencia na que se falará de como lle afecta ao sector vitivinícola a Lei da Cadea Alimentaria. “Na Denominación de Orixe Ribeira Sacra, a Lei da Cadea Alimentaria segue sendo unha descoñecida e temos detectado incumprimentos de todo tipo que, ademais, non se denuncian: impagos, incumprimento de prazos, incumprimentos dos requisitos que figuran no contrato, etc” comentan dende o Sindicato Labrego Galego-Comisións Labregas. Para falar deste tema, contarase con Oliva Lorenzo Grandía, traballadora en Lugo no Control de Prácticas Comerciais Desleais da Consellería de Medio Rural que coñece de primeira man a D.O Ribeira Sacra e a súa situación.
E para rematar este ciclo, o sábado 6 de setembro a sesión divulgativa, concretamente unha charla sobre a vendima do 2025 na Ribeira Sacra, terá lugar na Casa da Cultura do Concello de Taboada ás 12:00 horas.
