En Folgoso do Courel a Consellería investiu 91.400 euros para renovar 23,13 hectáreas de pastos, das cales 13,75 están no monte das Rozadas e 9,3 no de Seceda.
Os traballos executados incluíron a escavación en desmonte e o arranque ou acordoado de cachopas. Tamén se construíron infraestruturas de mobilidade, como pasos canadenses, que evitan que escape o gando que se cría en réxime extensivo, e mesmo se arranxou un camiño no monte de Seceda. Realizáronse peches perimetrais e instaláronse bebedoiros e comedeiros para o gando en distintos puntos do terreo acotado. Con estas medidas a Xunta asegura que pretende fomentar sistemas de xestión agraria sustentables e rendibles e contribuír á prevención de incendios.
José Manuel Balseiro sinala que hai un mercado crecente para os produtos alimentarios de calidade baseados en métodos de produción tradicionais, que son “compatibles coa obtención de rendibilidade para os produtores e poden contribuír a fixar poboación nova no rural”.
