Ante o grave ataque con cócteles molotov contra o inmoble destinado a ser centro de acollida de menores non acompañados en Monforte, distintas persoas e colectivos da sociedade civil monfortina convocan á cidadanía a concentrarse este domingo, 21 de setembro, ás 12:00 horas na Praza de España.

A convocatoria nace de forma cidadá, coa vontade de responder pacificamente a este acto de violencia e intolerancia e de defender os valores da convivencia, da solidariedade e do respecto aos dereitos humanos máis básicos.

Durante a concentración darase lectura a un manifesto no que se condenará con firmeza este ataque e se apelará á cohesión social e á convivencia en igualdade. A lectura contará coa participación da escritora, Olga Novo, Premio Nacional de Poesía. “A cidadanía de Monforte e da comarca está chamada a participar masivamente nesta mobilización en defensa da paz social e da dignidade”, insisten.

O alcalde convoca xunta de voceiros

O alcalde de Monforte vén de convocar unha xunta de voceiros para este luns, 22 de setembro, ás 9.00 horas, para analizar a situación conxuntamente con todos os grupos políticos da corporación municipal “e plantexar un rexeitamento unánime de todos concelleiros diante dos feitos tan graves que se veñen de producir”, indicou Tomé.

O Alcalde recibiu a chamada da Policía Local de Monforte ás 3.11 horas da madrugada na que se lle informaba do incidente no edificio e de que o incendio provocado polos cócteles molotov estaba controlado, facéndose cargo a Policía Nacional da investigación dos feitos.