López Campos lembrou que Ribeira Sacra: Paisaxe da auga xa forma parte das propostas admitidas para ser avaliadas polo Comité Mundial da Unesco, “tras cumprir a Xunta puntualmente cos trámites, documentación e tempos exixidos”. Neste senso, defendeu a “candidatura madura e sólida presentada”, da que lembrou que está actualmente na súa recta final.
“É moi difícil, case imposible, que a Ribeira Sacra defraude”, aseverou López Campos e lembrou que a candidatura presenta unha paisaxe construída co uso da auga “dun xeito novidoso que non está presente aínda de xeito suficiente na Lista de Patrimonio Mundial”. Así, enxalzou “os atributos especiais que fan único este territorio e paisaxe”, fancendo referencia aos canóns e vales fluviais esculpidos pola auga e ao relevante patrimonio hidráulico que atesoura.
O conselleiro advertiu da importancia dos próximos pasos a dar, como a visita que a Ribeira Sacra recibirá nos primeiros día de outubro por parte de consultores da Unesco, “á que lle seguirán outros procedementos de cara á decisión definitiva deste organismo no segundo semestre do vindeiro ano”, avanzou.
“O camiño que nos queda é moi difícil e crucial”, pero as sensacións son boas e mostrouse confiado na consecución desta distinción en 2026. Agradeceu a “colaboración e apoio en todo momento” do Ministerio de Cultura e tamén da comunidade, veciñanza, axentes locais e institucións dos 26 concellos de Lugo e Ourense que integran a candidatura.
Tamén salientou o “esforzo e traballo sen descanso” por parte da Xunta para fornecer Ribeira Sacra: Paisaxe da auga. Así, sinalou os preto de 8 M€ que a Administración autonómica ten investido na conservación e posta en valor de máis de 40 bens patrimoniais deste territorio das provincias de Ourense e Lugo nestes últimos anos.
