A maior parte das persoas usuarias do Viñobús Vendima tiñan procedencia galega (A Coruña e Lugo as provincias con máis representación), aínda que tamén tivemos visitantes de Alacante, Cidade Real, Navarra, Madrid e mesmo do Brasil.
Co remate do Viñobús Vendima, dáselle continuidade á oferta turística coa posta en marcha do, tamén clásico, programa de actividades A Caída da Folla, que se estenderá nas fins de semana entre o 11 de outubro e o 9 de novembro.
Entre as propostas inclúense experiencias de contacto coa natureza como rutas de recollida de setas, baños de bosque, unha ruta musicada entre viñedos ou un curso de orientación en montaña; iniciativas culturais e sensoriais como a creación de xabóns artesanais inspirados no outono, a visita nocturna a un mosteiro con cata maridada ou un percorrido pola minería aurífera no Xeopoarque Montañas do Courel; así como actividades de astroturismo, aproveitando a calidade do ceo nocturno en Ribeira Sacra e o recente estreado Destino Starlight no Monte Faro, Chantada, e outras de turismo activo como paseos en BTT.
A información completa pode consultarse en https://turismo.ribeirasacra.org/acaidadafolla2025 | O prazo de reserva está aberto
Con esta programación, o Consorcio continúa a súa aposta pola desestacionalización do turismo no xeodestino, poñendo en valor os recursos máis aló da tempada alta estival, e consolidar Ribeira Sacra como un destino sostible, vencellado á paisaxe, á cultura e ao benestar.
A este respecto péchase setembro con preto de 5.710 prazas diarias ocupadas. En porcentaxe, tradúcese nun 57% de ocupación media (67% nas fins de semana e 51% en días laborais). Para outubro, atópanse reservadas case a metade das prazas (45%). A ocupación para a Ponte do Pilar (traslado do festivo a luns en Andalucía, Aragón, Asturias, Castela e León e Estremadura), atópase nun 67%.
