O sábado 4 de outubro celebrouse o 35 aniversario do Conservatorio Profesional de Música Adagio na Igrexa de Nosa Señora da Antiga,acto que contou tamén cunha homenaxe ao fundador deste conservatorio, Manuel Randulfe Jácome.
O acto conmemorativo, que tivo lugar na Igrexa de Nosa Señora a Antiga e contou coa presenza do Alcalde e as concelleiras de Cultura, Marina Doutón, e Muller e Igualdade, Margarita López, comezou ás 18.30 horas cunha proxección comentada sobre a traxectoria concertista e docente de Manuel Randulfe. A continuación houbo un recital musical a cargo dos alumnos do Conservatorio Adagio, e para rematar serviuse un aperitivo no Claustro Monumental dos Escolapios.
José Tomé destacou a calidade artística de Manuel Randulfe e a aposta deste centro pola formación musical nas diferentes disciplinas.
O CONSERVATORIO ADAGIO
O Conservatorio Adagio suma 35 anos de historia na cidade de Monforte e imparte ensinanzas musicais nos grados elemental e profesional nas seguintes modalidades: piano, guitarra, guitarra eléctrica, baixo eléctrico, percusión e batería. Na actualidade conta cuns 60 alumnos.
