Gastrónoma é un dos principais puntos de encontro do sector da gastronomía e da hostalaría, tanto a nivel nacional como internacional, con espazos dedicados a produtos, formación, experiencias de viño e contacto directo entre produtores, distribuidores e profesionais do canal horeca. A D.O. Ribeira Sacra participou no “Túnel do Viño” con 13 referencias.

Durante a feira, a Directora Técnica do Consello Regulador, Beatriz Soto González, atendeu ás persoas visitantes profesionais, ofrecendo información detallada sobre as particularidades dos viños deste territorio vitícola amparado.

Ademais, no marco da feira, realizáronse dúas presentacións específicas, de 45 minutos cada unha, dirixidas a 24 consumidores finais por sesión:

26 de outubro – Cata Degustación de Viños da D.O. Ribeira Sacra, en colaboración con Daveiga. Esta actividade foi impartida pola directora técnica, Beatriz Soto González, e nela presentáronse os valores da denominación: a súa tradición vitícola, as condicións de produción, e pechouse cunha cata comentada das seguintes referencias: Tinto Ribeira Sacra Summum (colleita 2024); Branco Ribeira Sacra Summum (colleita 2024); e Tinto Ribeira Sacra Summum (mención elaboración en barrica).

27 de outubro – Galicia Sabe AMAR: Mexillón de Galicia, en colaboración coa DOP Mexillón de Galicia. Esta sesión foi impartida polo chef Marcos Cabanas, do Restaurante El Olivo (Narón, A Coruña).

Coa presenza en ‘Gastrónoma’, o Consello Regulador da D.O. Ribeira Sacra buscaba reforzar a súa presenza en feiras especializadas, estreitar vínculos con distribuidores e prescritores do sector, e achegar a súa oferta vitícola a un público especializado que valora a singularidade e a calidade dos viños desta denominación.