XANTAR dedicou a xornada do venres 21 de novembro a dúas vilas que levan participando neste evento 26 anos ininterrompidamente, é dicir, dende a primeira edición en 1999. Unha delas é a Cámara Municipal de Vila Real, en Portugal, e a outra o Concello de Sober, na Ribeira Sacra.

O alcalde, Luis Fernández Guitián, recibiu unha placa conmemorativa de mans do xerente de Expourense, Rogelio Martínez, e presidiu a degustación de Viño de Amandi e Rosca de Sober con queixo na que tamén participou o director de Agacal, Martín Alemparte.

SOBER EN XANTAR 2025

Ademais de promocionar os seus viños de Amandi e a súa localización privilexiada na Ribeira Sacra, Sober acode este ano a Xantar para presentar o “Proxecto Rosca de Sober” impulsado pola Consellería do Medio Rural e centrado na investigación e caracterización deste produto que neste concello consideran “testemuño vivo da identidade dun territorio e patrimonio gastronómico”.

O proxecto baséase en tres eixos principais: a documentación e preservación das calidades da Rosca de Sober; o desenvolvemento de sistemas de produción e conservación que respecten a súa autenticidade; e a exploración de novos usos culinarios que a proxecten cara á gastronomía contemporánea e a hostalería.

O Concello de Sober expón os seus recursos turísticos e gastronómicos nun stand propio ata o vindeiro domingo, 23 de novembro.